MANILA, Philippines - Kahit na maipatupad ang panukalang “unitary tax system” sa mga produktong tabako at alak, magpapatuloy pa rin ang smuggling ng sigarilyo sa bansa.
Paliwanag ni Cavite Rep. Joseph Emilio Abaya, pangunahing may akda ng House Bill 5725, kasabay ng posibleng paglaganap ng smuggling ng sigarilyo sa bansa kaya’t mas makabubuti umanong alertuhin na rin ang Bureau of Customs (BOC).
Ang reaksyon ng kongresista ay bunsod sa napaunang lumabas sa mga pahayagan kung ano ang magiging resulta ng HB 5727 sa smuggling activities at sa napaulat na rin na isang kongresista ang nananabako ng kulay itim na sigarilyo na P28.00 lamang ang halaga ng kaha dahil ito ay ipinuslit mula sa Indonesia.
Ang naturang kongresista umano ay kabilang sa listahan ng 50 pinakamayaman na miyembro ng Kamara.
Inamin din ni Abaya na may dahilan upang maalarma ang mga local cigarette manufacturers at dealers tungkol sa laganap na pagpupuslit dahil sa posibleng pagkalugi ng kanilang mga produkto.
Matatandaan na una nang ibinunyag ni Blake Clinton Dy, vice president ng Associated Anglo-American Tobacco Corporation, na naglipana ang mga smuggled cigarettes sa bansa mula sa Indonesia, Thailand at Vietnam na aniya’y idinadaan sa Mindanao particular sa Sulu, Zamboanga at Tawi-Tawi.
Binatikos din ni Dy si Finance Secretary Cesar Purisima sa pagsasabing mabubura at tuluyan nang masusugpo ang pagpupuslit ng sigarilyo kapag naipatupad ang Abaya bill o ang HB 5727.