Tiangco 'tinatakot' daw ni Gonzales

MANILA, Philippines - Dahilan sa umano’y pagtestigo sa kampo ni Chief Justice Renato Corona ni Navotas Rep. Toby Tiangco kaya’t tinatakot umano siya ni House Majority leader Neptali Gonzales Jr.

Ayon kay Tiangco, hindi nararapat kay Gonzales na magbato ng mga pagbabanta na patatalsikin siya mula sa Kamara sa sandaling ang testimonya nito ay mababastos ang mga lumagdang kongresista sa impeachment complaint.

Giit ng kongresista, hindi tama ang naging aksyon ni Gonzales dahil alam naman umano nito na ang naging pagbabanta ay ground para sa disbarment nito.

“Nakakagulat ito kasi abugado siya di ba? Alam niya na bawal na bawal sa justice system ang pananakot sa isang witness. Threatening a witness is an illegal act, so if there is someone who is doing unruly behavior eh siya iyon, siya dapat ang ma-expel hindi ako,” ayon pa kay Tiangco.

Itinanggi naman ni Gonzales ang paratang na tinatakot niya si Tiangco bagkus ay pinaalalahanan lamang niya ito pero hindi pinigilan ng Kamara upang tumestigo sa impeachment trial.