Impeachment vs PNoy ibinasura ng minorya

MANILA, Philippines - Hindi ieendorso ng House minority bloc ang impeachment complaint laban kay Pangulong Aquino na inihain ng isang indibwal.

Sinabi ni House mino­rity leader Danilo Suarez, hindi nila nakikita ang pa­ngangailan na magsampa ng impeachment kay Aquino kaugnay ng reklamo ni Danilo Lihaylihay na lugi umano ang gobyerno sa pagbebenta nito ng lupa sa Baguio City sa SM Group.

Ayon kay Suarez, kung sila ay magsasampa ng impeachment sisiguruhin nila na ito ay malakas upang hindi sabihin na inaabuso lamang nila ang proseso ng impeachment.

Nanawagan naman si Suarez sa administras­yon na huwag magagalit sa kanila sa tuwing mayroong magbibigay ng impeachment complaint sa kanila dahil ginagawa lamang nila ang kanilang trabaho bilang mambabatas.

Sa Lunes ay pag-u­u­sapan ng grupo nila kung ano ang gagawin sa impeachment complaint na gustong ipa-endorso ni Atty. Oliver Lozano. (Butch Quejada/Gemma Garcia)