Thai PM bagay daw kay PNoy - Kris

MANILA, Philippines - Ipinahiwatig ni presidential sister Kris Aquino-Yap na bagay daw sa kanyang kuya na si Pangulong Benigno­ Aquino III ang dumalaw sa bansa na si Thailand Prime Minister Yingluck Shinawatra para sa state visit nito sa Pilipinas kahapon.

Sinabi ni Kris sa kanyang twitter account, bagay na bagay daw kay PNoy ang PM ng Thailand.

Bandang alas-11 ng umaga nang dumating si PM Shinawatra sa Malacañang at malugod itong tinanggap ni Pangulong Benigno Aquino III at kanyang Gabinete. Kabilang din sa sumalubong sa Thai PM ay si House Speaker Feliciano Belmonte Jr.

Nagkaroon ng bilateral meeting sina Pangulong Aquino at Yingluck sa Aguinaldo room kung saan ay pinag-usapan ng 2 lider ang ukol sa agrikultura, disaster risk management at kung paano palalakasin ang relasyon ng 2 bansa.

Namataan din sa state luncheon na handog ni PNoy kay PM Yingluck ang ilang senator-judges sa impeachment trial ni Chief Justice Renato Corona.

Kabilang sa namataang mambabatas sina Sen. Alan Peter Cayetano, Sen. Edgardo Angara, Sen. Franklin Drilon at Speaker Sonny Belmonte. Wala naman sa event si Senate Pres. Juan Ponce-Enrile na karaniwang naiimbitahan sa ganitong state affair. Bukod kay Kris at mga kapatid nito ay naroroon din si Boy Abunda.

Umalis din si PM Yingluck kahapon ng hapon at tumagal lamang ito sa bansa ng 5 oras.