MANILA, Philippines - Humarap kahapon sa Senado ang kontrobersiyal na negosyante na si Roberto Ongpin kung saan itinanggi niyang ginamit niya ang koneksiyon kay dating First Gentleman Jose Miguel Arroyo upang makautang ng nasa P660 milyon sa Development Bank of the Philippines (DBP).
Itinanggi rin ni Ongpin na crony siya ni Arroyo bagaman at inamin niyang kaibigan niya ito.
“Mike Arroyo is a friend of mine and has been before Gloria Macapagal-Arroyo was president but friendship does not mean that I was his crony nor that I fronted for him in any of my banking deals, much less deal at hand,” pahayag ni Ongpin.
Matatandaan na 2 beses na inisnab ni Ongpin ang hearing ng Senado tungkol sa diumano’y maanomalyang pagpapautang ng DBP sa Delta Ventures Resources Inc. (DVRI) na sinasabing pag-aari ni Ongpin noong 2009.
Nilinaw ni Ongpin na 10-araw na siyang nakalabas ng bansa noong Octobre 2 nang malaman niya na iniimbitahan siya ng Senado na humarap sa pagdinig.