MANILA, Philippines - Dalawang heneral na mag-mistah sa Philippine Military Academy (PMA) Class ’79 ang magkaribal sa babakantehing puwesto ni outgoing Army Chief Lt. Gen. Arthur Ortiz na magreretiro na sa susunod na linggo.
Ayon sa military sources, sina Deputy Chief of Staff Lt. Gen. Anthony Alcantara, ang 3rd man ng AFP na pangatlo rin sa honor roll ng PMA Class ‘79 at AFP-Northern Luzon Command Chief Lt. Gen. Jesse Dellosa ang nangungunang contender sa Army post.
Isa rin sa dalawa ang ikinokonsidera ni Pangulong Aquino na maging susunod na Chief of Staff kapag nagretiro na si Gen. Eduardo Oban Jr.
Si Ortiz ay nakatakda sanang magretiro sa Nobyembre 13 pero gagawin ito ng mas maaga na posibleng sa Nobyembre 9 bago bumiyahe si PNoy para sa APEC.
Inaasahan namang bago umalis si PNoy sa bansa patungong Hawaii ay iaanunsyo na nito ang mapalad na successor ni Ortiz.