FG, Versoza kakasuhan ng Senado sa chopper scam

MANILA, Philippines - Inirekomenda ng Se­nate Blue Ribbon Committee na kasuhan ng ka­­tiwalian o paglabag sa anti-graft and corrupt practices act sina dating First Gentleman Mike Arroyo at dating Philippine National Police chief Jesus Versoza at iba pang personalidad na sangkot sa kontrobersiyal na pagbebenta ng second hand na choppers sa PNP.

Ngayon ilalabas ng Blue Ribbon committee ang report tungkol sa isi­nagawang imbestigasyon ng komite.

Ayon kay Sen. Panfilo Lacson, mas “air tight” ang kanilang kasong ihaharap laban kay Arroyo at Versoza kumpara sa kasong plunder na inihain ng PNP leadership na umano’y maraming butas.

Ang report ng komite ay ilalabas sa Kapihan sa Senado dakong alas-11:30 ng umaga sa pa­ngunguna ni Senator Teo­fisto Guingona III, chairman ng komite.

Pagkatapos ng press conference na inaasa­ hang tatagal ng isang oras, mag­tutungo si Guin­gona kasama ang ilang senador sa Office of the Ombudsman upang magsampa ng kaso laban sa mga taong sinasabing nagsabwatan sa maanomalyang kontrata.

Matatandaan na di­rek­­tang idinawit nina Ar­­chi­bald Legaspi Po, presidente ng  LionAir, at  Hilario de Vera, may ari ng  Manila Aerospace Products Tra­ding Corp. si dating First Gentleman  na sangkot sa di­umano’y ma­anomalyang pagbebenta ng second hand na helikopter sa PNP noong 2009.