PNoy tutol sa heroes burial kay FM

MANILA, Philippines - Iginiit kahapon ni Pa­ngulong Aquino na hindi bibigyan ng heroes bu­rial at military honors ang yumaong Pa­ngulong Ferdinand Marcos.

Sinabi ni Pangulong Aquino sa pagdalo nito sa forum ng Foreign Correspondents Asso­ciation of the Philippines (FOCAP), hindi siya pabor na bigyan ng heroes burial ang yumaong diktador.

Wika ni PNoy, magiging injustice ito ka­pag ginastusan pa ng gob­yerno ang heroes burial para sa yumaong dik­tador.

Idinagdag pa ni Aquino, magbibigay ito ng ma­samang mensahe dahil hindi maaaring kalimutan ng sambaya­nan ang mga naging kasalanan ni Marcos.

Kaugnay nito, nag-sorry ang Pangulo kay Vice President Jejomar Binay dahil inatasan pa nito noon na magsagawa ng pag-aaral pero sa bandang huli ay siya rin ang magdedesisyon.

Magugunitang matapos ang konsultasyon sa iba’t ibang sektor, inirekomenda ni Binay na ilibing si Marcos sa kanyang lalawigan sa Ilocos Norte at bigyan ng full military honors.

Samantala, tinawag ni Sen. Ferdinand “Bong­­ bong” Marcos Jr. si Pa­ngulong Aquino na wa­lang isang salita.

Ayon kay Marcos, maliwanag na nakapag-desisyon na ang Pa­ngulo bago pa man ito sumabak sa kampanya kung saan naungkat ang isyu ng paglilibing sa dating pangulo.

“Sa aking pananaw eh nakapagdecide na pala siya bago pa nung kampanya. Hindi pala siya tapat sa kanyang sinabi nung kanyang pagka-upo. It was play acting on his part, the President’s part.” sabi ni Marcos. 

Sinabi pa ni Marcos na pinalampas ng Pa­ngulo ang pagkaka­taon na pag-isahin ang bansa.

Matatandaan na hi­niling ng Pangulo kay Bi­nay na pag-aralan ang isyu at magbigay ng re­komendasyon tung­ kol sa paglilibing kay Marcos.