Obispo nanumbat kay PNoy

Manila, Philippines - ‘Hindi magiging pangulo ang  mama mo kundi dahil sa mga Obispo!”

Ito naman ang umano’y tila panunumbat ni Sorsogon Bishop Arturo Bastes kay Pangulong Benigno  Aquino III matapos na makaladkad ang ilang Obispo sa usapin ng  sasakyan na mula sa Philippine Charity Sweepstakes Office  (PCSO).

Sinabi ni Bastes na makikita at alam ng  buong bansa kung sino ang  sumuporta  kay dating Pangulong Corazon Aquino at mapatanggal sa puwesto si dating Pangulong Ferdinand Marcos.

Dahil sa sulat ng mga Obispo, bumagsak si Marcos at nakapuwesto si Pangulong Cory.

Ayon kay Bastes, dapat na  tigilan na ni  PNoy ang pagkaladkad sa mga Obispo sa pulitika dahil malalayo lamang siya sa taongbayan.

Aniya, huwag sana pag-initan ang mga obispo na tunay at totoong naglilingkod sa mga mahihirap.

Posible din umanong ginagamit silang panakip butas ng administrasyon upang  pagtakpan ang kanilang kapalpakan.