RII Builders ibinuking na supplier ng uling
MANILA, Philippines - Nakatakdang imbestigahan ng City Council ng Manila ang posibilidad na may pang-aabuso at pagkakaroon ng ilang paglabag ng Harbour Center Port Terminal Inc. (HCPTI) ng kanilang Environmental Clearance Certificate (ECC) kasunod ang pag-amin na sangkot sila sa pangangasiwa at pag-iimbak ng uling para mag-supply ng kuryente sa ibat ibang energy companies sa bansa.
Ibinunyag ni Councilor Joel Chua, Adhoc Committe Chairman sa pagdinig na ang R-II Builders’ HCPTI ay umaming bukod sa mga cargoes ng semento ng kompanya ay nagsu-supply rin sila ng uling sa Rocky Energy International, Encoal Corporation, SCG Trading, Noble Energy, Jet Power at VT Primetech.
Paliwanag pa ng Manila Dad na malinaw na nakasaad sa ECC na ang HCPTI ay awtorisado lamang sa development at operation ng container at passenger terminal facilities, container yard, substation yard at power house facility at hindi ang pagsu-supply ng enerhiya.
Nakasaad din umano sa ECC na ang R-II Builders ay maari lamang gamitin para sa maintenance shop/gas station/equipment depot complex, warehouse storage area, general cargo yard, operations at administrative building, parking area at road way na sumasakop sa sampung ektarya.
Matatandaang nitong May 18, 2011 sa bisa ng isang resolution ay nagkakaisang nilagdaan nina committee chairman Chua, Vice Chairman Marlon Lacson at limang iba pang miyembrong konsehal ang rekomendasyon ng komite na magsagawa ang DENR ng updated monitoring compliance report sa ECC ng HCPTI particular ang Clean Air and Water Acts upang masigurong pulido at lehitimo ang Certificate of Analysis sa hangin at tubig na isinumite ng kumpanya sa ginanap na pagdinig.
Hiniling din ng komite sa DENR na tiyakin kung ang imbakan ng mga uling ay saklaw pa ng ECC at hindi maghahatid ng pangamba sa Manila Bay at magdulot ng polusyon sa hangin sa bahagi ng Maynila.
- Latest
- Trending
