Bosero nalumos human hose natangtang

CEBU, Philippines -  Nalumos patay ang usa ka ‘bosero’ nga mogamit og compressor sa iyang pagpangisda human giingong natangtang ang hose nga gigamit niini sa compressor aron makaginhawa ilawom sa dagat samtang kini nangisda sa kadagatan sa sitio Tabunok, barangay Tapilon lungsod sa Daanbantayan niadtong Huwebes sa alas 6:00 sa buntag.

Ang biktima mao si Jonathan Coyoca Fernandez, 26, molupyo sa sitio Looc barangay Tapilon.

Matud ni PO2 Romar Andreno sa Daanbantayan Police Station dihang nahinabi sa Banat News ang biktima milawig sa dagat nianang alas-5 sa hapon niadtong Miyerkules uban ang ginganlan og Renante.

Ang asawa sa namatay nga si Nesha nagkanayon base usab sa gitug-an kaniya ni Renante samtang sila nanagat kalit nga natangtang ang hose nga gisumpay ngadto sa compressor nga nagkutay padulong kang Fernandez didto sa ilawom.

Tungod sa kalawom wala na kini makaabot pa sa ibabaw aron makahanggab og hangin maong nalumos.

Ang mga kabanay nagdumili na sa pagpa-awtopsiya sa patay’ng lawas tungod kay kumbinsido sila nga nalumos kini. (BANAT NEWS)