CEBU, Philippines - Patay ang usa ka tigulang lalaki nga mamuhatay og bukag human kini dunggaba makadaghang higayon sa babayeng manguykuyay og basura nga giingong nalisoan na sa pangisip.
Ang pagpanunggab nahitabo kagahapon sa buntag diha sa eskina sa dalan Magallanes ug Panganiban ning dakbayan nga miresulta sa kamatayon ni Jesus Belandres nga nagpuyo sa sidewalk sa nahisgutang lugar.
Si Belandres nakaangkon og daghang samad dinunggaban sa nagkadaiyang parte sa iyang lawas ug dughan ug patay na pag-abot sa Cebu City Medical Center human dunggaba ni Leding Rivera, 27, nga manguykuyay og basura apan giingong nalisoan na usab sa pangisip.
Si Belandres daling gitabang sa mga tawo sa dapit ug gipasakay’g traysikad ug gidala ngadto sa nahisgutang tambalanan.
Si PO2 Leoroy Baguio sa Homicide Section sa Cebu City Police Office (CCPO) nga nahinabi sa Banat News subay sa ilang imbestigasyon natulog ang suspetsado ug gipukaw sa biktima.
Apan nasuko ang suspek ug miresulta sa ilang sinumbagay ug human mabunali, gipunit sa suspek ang kutsilyo ni Belandres ug gitusak-tusak kini og dunggab.
Si Rivera misuway unta og ikyas apan naabtan sa mga tanod sa barangay Ermita nga mitabang sa pagpangita sa suspek ug gi-turnover ngadto sa Homicide Section.
Matud sa mga imbestigador nga dili magkadimao ang sinultihan sa suspetsado kay mosimang kini kun ilang pangutan-on. (BANAT NEWS)