CEBU, Philippines - Naukay ang kapolisan sa Danao kagahapon human usa ka 13-anyos nga dalagita ang midangop sa ilang buhatan ug nangangkong gidagit siya sa mga langyaw apan nakaeskapo.
Ang kapolisan sa Danao misusi na sa maong impormasyon human usa ka inahan ang miduol kanila niadtong Huwebes nga nag-ingong wala na mabalik ang iyang anak nga nananghid nga mikuyog sa usa ka ginganlan og “Mara” didto sa usa ka birthday party.
Sumala pa sa report sa TV Patrol Central Visayas kagahapon ang inahan sa bata nakig-estorya pa sa cellphone sa anak apan giingong daw luya kaayo og tingog ang bata ug naputol-putol maong nabalaka siya og maayo sanglit wala na kini makauli.
Kagahapon alas-12 sa udto kalit mibutho ang maong bata sa police station sa Danao ug misumbong nga nakaipsot siya sa van nga gisakyan uban sa gibana-bana niyang napulo ngadto sa 20 ka mga dalagita nga gisignit sa mga langyaw. Ang bata nangangkon sad nga sa iyang pag-eskapo gipusil siya sa maong mga langyaw apan nakapalayo gyud siya gikan sa Catmon.
Matud ni SPO3 Arestio Espina ang desk officer sa Danao City Police Station nga gihinabi sa Banat News nga ang maong dalagita gisukitsukit sa ilang hepe nga si Chief Insp. Alvin Ballo.
Sa pagsusi sa kapolisan sa mga gihisgutang barangay sa bata sa Catmon ug Carmen way bisan usa ka testigos nga nakasuporta sa pangangkon sa bata ilabi na kabahin sa van nga giingong adunay plakang ‘MXZ- 183’ nga giingong maoy gikargahan sa mga bata apan negatibo ang resulta.
Si Sr. Supt. Patrocinio Comendador sa gipadalang text message dinhi sa Banat News miingon “no kidnapping took place” ug wala na motubag pa sa ubang pangutana.
Ang kapolisan nahibulong usab nganong wala pay bisan usa sa mga ginikanan sa mga batang pabiling gihuptan sa mga ‘kidnaper’ ang midangop sa ilang buhatan. (BANAT NEWS)