Joavan 'Nanion' gibabagan

CEBU, Philippines -  Na-alarma na usab kagahapong adlawa ang kontrobersyal nga anak sa mayor sa Talisay nga si Joavan Fernandez human usa ka tawo ang mireklamong gitionan niini og armas kagahapon diha sa North Reclamation Area.

Ang kapolisan daling miresponde ug nababagan ang Isuzu Bighorn nga adunay plakang YEZ-460 sa likod nga ang atubangan adunay vanity plate nga “Mayor” nga gimaneho ni Joavan diha sa dalan B. Rodriguez ning dakbayan.

Daling gipakanaog si Joavan ug gikapkapan ug gisusi usab ang sulod sa sakyanan niini apan walay nakuhang armas gikan kaniya.

Tungod niini, si Joavan gi-turnover sa kapolisan ngadto sa buhatan sa City Traffic Operation Management tungod sa paggamit niini og commemorative plate nga Mayor nga di man kini mayor. Sa buhatan sa CITOM, si Fernandez napakyas pagpresentar sa bag-ong Official Receipt (OR) ug Certificate of Registration (CR) sa sakyanan nga iyang gimaneho.

Apan pipila ka gutlo ang milabay miabot ang abogado ni Joavan ug dala ang bag-ong mga dokumento apan bisan paman niini gipamulta siya og P4,000 tungod sa wala pagdala sa bag-ong CR ug ang using improvised plate.

Si SPO1 Dioniso Galo, ang imbestigador sa maong kaso miisyu og Temporary Operators Permit (TOP) gawas sa multa ug gibuhian si Joavan ug ang iyang sakyanan.

Si Joavan kinsa mitawag sa Banat News human mabuhii nagkanayon nga posibleng mosang-at siya og reklamo batok sa sakop sa Special Weapons and Tactics (SWAT) nga misukmag kaniya atol sa pagrekisa sa iyang lawas bisan wala siya magmagahi.

Gihimakak usab ni Joavan nga nanion siya tungod kay aduna ra siya gihatud sa Carreta sayo nianang adlawa sa wala pa siya dakpa. (BANAT NEWS)