Hospital bill umabot na sa P1.7-M OFW na-tetano sa pako, kritikal

MANILA, Philippines - Umabot na sa P1.7 milyon ang hospital bill ng isang 34-anyos na overseas Filipino worker dahil lamang sa tetano dulot ng naapakang kinakalawang na pako sa Saudi Arabia.

Nakilala ang OFW na si Eduardo Vidal, meka­niko ng isang auto shop sa Al-Ahsa, eastern province sa Saudi at tubong Wao, Lanao del Sur.

Nabatid kay John Leo­nard Monterona, regional coordinator ng Migrante-Middle East sa Embahada ng Pilipinas sa Riyadh, mahigit 2 buwan na ngayong naka-confine sa Mousawat Hospital si Vidal at mahinang-mahina ang pangangatawan. Umaabot na rin umano sa SR150,000 o tinatayang P1.76 milyon ang kanyang bayarin sa ospital.

Handa naman uma­nong makipagtulungan sa Embahada ang employer ni Vidal para mapauwi ito sa Pilipinas. Ga­yunman, dahil sa maselang kalagayan nito ay hindi pa siya maaaring ibiyahe.

Si Vidal ay isinugod sa ospital noong Nobyembre 2010 matapos ma-impeksyon kasunod ng aksidenteng pagkakaapak nito sa isang ki­nakalawang na pako sa loob ng pinapasukang car shop.

Sa rekord, umalis sa Pilipinas ang nasabing OFW upang magtrabaho sa Saudi noong Setyembre 2008.