MANILA, Philippines – Dinismis sa serbisyo ng tanggapan ng Ombudsman ang isang baguhang pulis ng Pagudpod, Ilocos Norte dahil sa pagkakaroon nito ng nakaw na sasakyan.
Sa tatlong pahinang desisyon, inutos ng Ombudsman ang pagsibak sa serbisyo kay PO1 Ruel Tamargo ng Bangui Police Station sa Pagudpod, Ilocos Norte bukod sa hindi nito pagtanggap ng benepisyo at hindi na maaring magtrabaho sa alinmang tanggapan ng gobyerno.
Sa record ng PNP Provincial Office ng Ilocos Norte noong Agosto 2006, tumanggap ito ng impormasyon na ang nakaw na sasakyan ay nakitang naka-park sa Brgy. Poblacion 2, Sitio Regta, Pagudpod, Ilocos Norte na ginagamit ni Tamargo.
Sa kanyang depensa, sinabi ni Tamargo na ang sasakyan ay iniwan sa kanya ng kanyang pinsan dahil may utang ito sa kanya. Pero sinasabi ng tanggapan ng Ombudsman na lumabag sa Gross Misconduct ang naturang pulis na ang katapat na parusa ay pagtatanggal dito sa serbisyo.
Inutos din ng Ombudsman ang pagsasampa kay Tamargo ng paglabag sa Anti-Fencing Law (PD 1612) na nagsasaad na ang pag-iingat ng sinuman sa mga nakaw na gamit tulad ng sasakyan ay isang malinaw na ebidensiya ng paglabag dito.