Habambuhay sa 8 kidnaper ng Tsinoy

MANILA, Philippines - Habambuhay na pag­kabilanggo ang inihatol ng Quezon City Regional Trial  Court (QCRTC) sa walo katao kabilang ang isang babae na napatunayang   guilty sa kasong pagdukot sa isang Filipino-Chinese trader noong  Disyembre 2001.

Sa 18 pahinang desisyon, sinabi ni QCRTC Judge Theresa Yadao  ng Branch 81, ang mga nasentensiyahan ay sina Ric Parcia, Roberto Ferrer, Fernando Somido, Rogelio Bibit at kapatid na si  Emma Bibit, Ray­mund Fruto, Felicito Braga, at dismiss na pulis na si  Vilmor Catamco ay positibong naituro ng biktimang si  Mae Ling Ang na siyang dumukot sa kanya. 

Sa 13 orihinal na akusado, tanging si  Parcia, Ferrer, Somido, Rogelio at Emma Bibit, Fruto, Braga at Catamco ang naaresto habang si Joselim Arnuco ay namatay na noong  2003.

Nananatili namang nakakalaya ang iba pang akusadong sina Philip Pagarido, Joel Bunales, Virgilio Corpuz at Rosendo Veloso.

Sa court records, sinasabing si  Mae Ling Ang, isang  grocery owner sa  Malabon City ay nakidnap sa  Hulong Duhat, Malabon City  noong Disyembre 20, 2001.

Sinabi ng biktima sa korte na pauwi na siya sa kanyang bahay kasama ang tauhan na si  Marites Fernando nang harangin ng apat na armadong la­laki at kunin siya palabas ng kanyang sasakyan.

Dalawampung milyon piso ang hiningi ng mga suspect sa pamilya ng biktima. 

Sa ikatlong araw ng biktima sa kamay ng mga suspect na- rescue ito ng pulisya habang nasa loob ng isang container van na inabandona sa Agham Road sa  Quezon City.

 Walang nakuhang ransom ang mga akusado dahil nakahingi agad ng tulong sa NAKTAF ang pamilya ng biktima at saka nahuli ang mga suspek.