Dahil sa trapik, hangin sa Metro Manila gumagrabe

MANILA, Philippines - Isinisi ng Department of Environment and Natural Resources (DENR) sa matinding daloy ng trapiko sa Metro Manila kung bakit lumulubha ang polusyon sa hangin sa nasabing lugar sa unang tatlong buwan ng 2010.

Ito ay makaraang lumabas sa pag-aaral na ginawa ng DENR sa air quality sa Metro Manila sa unang kuarter ng 2010 na umabot sa 190 micrograms per normal cubic meter ang suspended particles sa hangin na nagpakita ng mahigit sa dobleng taas sa normal amount na 90 micrograms.

“Ang dapat yung sasakyan mo, aandar lamang at mage-emit for 15 minutes. Dahil na-traffic ka, umabot ka ng isang oras. In effect, yung emission mo, multiplied 300 times,” pahayag ni DENR Secretary Ramon Paje.

Tinukoy ni Paje ang mga major thoroughfares sa Metro Manila tulad ng EDSA, Taft Ave. sa Pasay City at España boulevard sa Maynila sa may pinakamataas na suspended particles ng hangin.

Sinabi din ni Paje na ang patuloy na paglubha ng hangin sa Metro Manila ang siyang dahilan kung bakit patuloy din ang pagdami ng mga taong may respiratory diseases tulad ng TB at iba pa.