MANILA, Philippines - Nilinaw ng Malacañang na hindi kailanman ginamit ni Pangulong Noynoy Aquino ang media bilang palusot o “scapegoat” sa naganap na madugong hostage crisis.
Paliwanag ni Presidential Communications Secretary Ricky Carandang, hindi umano sinisisi ng Palasyo ang mga mamamahayag sa mga nangyari at sa halip ay hinihikayat lamang umano ng Pangulo ang lahat partikular na ang PNP at media upang mapabuti ang sitwasyon.
Idinagdag pa nito na welcome naman umano ang ginagawa ng media na self-examination at ang nakatakdang dayalogo sa susunod na linggo bukod pa sa summit na pangungunahan ng KBP, DILG at PNP.
Mag-iikot din umano ang kinatawan ng Palasyo sa mga media networks upang makipag-usap.
“You know, the President never used the media as scapegoat and none of us from Malacañang had ever blamed the media for what happened. Ang sinabi ni Pangulo is he was basically enjoining everybody, including the police and including ourselves, to see what we can do to improve the situation,” ayon pa kay Carandang.
Matatandaan na sa ginawang press briefing noong madaling araw ng Martes ilang oras matapos ang hostage crisis ay tahasang sinisi ni P-Noy ang media kung saan partikular na tinukoy nito ang “blow by blow coverage” ng media sa insidente kayat nahirapan umano ang mga pulis na magsagawa ng operasyon.
Dahil dito kaya umalma naman ang iba’t ibang media organizations sa pangunguna ng KBP at National Press Club (NPC) at iginiit na ginawa lamang nila ang kanilang trabaho kayat dapat ding ipatupad ng PNP ang kanilang tungkulin sa crowd control.