MANILA, Philippines - Isa sa mga pangunahing kasong tututukan ng Inter-Agency Council Against Trafficking (IACAT) na itinatag ng Department of Justice (DOJ) ay ang kaso ng negosyanteng si Mariano Tanenglian na inireklamo ang pamilya ng tatlo nitong kasambahay ng illegal detention, physical abuse at hindi makataong pagtrato.
Matatandaang si Justice Secretary Leila de Lima, dating chairperson ng Commission on Human Rights (CHR), ang nag-atas sa PNP, CHR at DSWD para i-rescue ang mga kasambahay ng mga Tanenglian.
Kasunod ng pagkaka-rescue ay umusad ang kaso at sa pamamagitan ng abogado ng mga kasambahay na si Atty. Al Parreno ay hiniling nito sa DOJ at IACAT na suportahan ang imbestigasyon sa anti-trafficking cases na isinampa laban sa mayamang negosyante.
Kaugnay nito, nangako ang IACAT na higit pa nitong paiigtingin ang kampanya laban sa trafficking in persons.
Sa pangunguna ni IACAT head Undersecretary Jose Vicente Salaraz ay iniutos ni Sec. De Lima ang pagtutok sa nasabing uri ng mga kaso kasunod ng resulta ng naging pulong sa pagitan ni President Benigno ‘PNoy’ Aquino III kung saan ay nagpahayag ang Pangulo ng labis na pagkabahala sa tumataas na kaso ng human trafficking sa bansa