PNP off-limits sa hinakot na ballot boxes ni Tinga
MANILA, Philippines - Matapos umanong puwersahang ipahakot ng kampo ni outgoing Taguig Mayor Freddie Tinga ang mga ballot boxes mula sa Taguig City Hall Plaza papunta sa City Hall auditorium, mismong mga pulis ay ipinagbawal na din umanong magbantay ng mga ballot boxes.
Sinasabing hindi na rin pinapasok sa auditorium ang mga pulis na ipinadala ni Taguig City Police Chief Col. Camilo Cascolan upang magbantay.
Maging ang mga watchers ni Mayor-elect Maria Laarni “Lani” Cayetano, na tumalo kay former Supreme Court Justice Dante Tinga, ama ni outgoing mayor Freddie, ay ayaw ding papasukin.
Matatandaang inilipat ng City Treasurer’s office sa pangunguna ni OIC treasurer Teresita Elias ang mga ballot boxes mula sa plaza ng City Hall papunta sa City Hall Auditorium. May 370 ballot boxes ang nasa kamay ni Elias na asawa ni Vice Mayor-elect George Elias. Ang mga Elias ay alyado umano sa mga Tinga.
Ang ilan sa mga ballot boxes na bukas na at wala ng padlock ay ang ballot box 102, 98, 99, 38, 46, 51, 123, at 53.
“Walang kaduda-duda na si OIC treasurer Mrs. Teresita Elias ay kakampi ng mga Tinga dahil ang asawa nito ay si vice mayor George Elias. Ang pwersahang paglipat ng mga ballot boxes na walang pahintulot ng Comelec ay lantarang conflict of interest. Di kami kayang dayain sa election returns kaya ang pinag-iinitan na ay ang ballot boxes, “ pahayag ni Team Cayetano spokesman at three-term councilor Noel Dizon.
Dagdag pa ni Dizon, malamang na patong patong na kaso ang abutin ni Mrs. Elias, outgoing Mayor Freddie, Vice-Mayor Elias, at kung sinu-sino pang mapapatunayan na may kaugnayan sa tangkang pagmaniobra ng ballot boxes at mga nilalaman nito.
- Latest
- Trending
