MANILA, Philippines - Lalong lumakas ang ugong-ugong tungkol sa panghihina umano ng pangangatawan ng tumatakbong alkalde sa Makati City na si Vice Mayor Ernesto Mercado, matapos may mag-check in umano na kamukhang-kamukha niya sa UERM hospital nitong linggo.
Ayon sa impormante sa ospital, gumamit umano ng ibang pangalan ang vice mayor para makaiwas sa media na siya ay nagpapasok sa ospital.
Tahimik at halos nakatakip ang mukha umano ni Mercado nang ipinasok ito sa ospital at hiniling dito na huwag ipaalam sa media na naroon siya. Sa suite umano ng ospital ito tumigil at lumabas noong April 28. May dalawang araw rin siyang namalagi rito.
Tila tumugma naman ito dahil hindi nangampanya si Mercado noong April 25 hanggang 28. Tahimik rin daw na lumabas sa ospital si Mercado para makaiwas media.
Matagal na ring napabalita ang masamang kondisyon ng pangangatawan ng bise alkalde kung saan nanawagan pa ang isang militanteng grupo na isapubliko ang tunay na health condition umano nito.