Martial law sa Basilan

MANILA, Philippines - Pinag-aaralan na ng pamahalaan ang posib­leng pagdedeklara ng Martial Law sa Basilan mata­pos ang madugong pag-atake ng mga bandidong Abu Sayyaf sa Isabela City noong Martes na ikinasawi ng 14 katao habang 12 pa ang nasugatan.

“This is a combination of both politics and terrorism, we are seriously looking into this,” pahayag ni Defense Secretary Nor­berto Gonzales na nag­sabing posibleng ireko­menda ng kaniyang department ang pag­de­deklara ng Martial Law sa lalawigan kung magpa­patuloy ang paghahasik ng terorismo ng mga bandido.

Sinasabi sa intelligence report ng security forces na ang mga bandidong Abu Sayyaf na nagmo-moonlighting bilang mga Private Armed Groups (PAGs) ng maimpluwensiyang pulitiko sa Basilan ang nasa likod ng pag-atake.

Ang uniporme umano ng pulis at militar na gi­namit ng mga umatakeng bandido na nagsagawa ng pambobomba at pama­maril ay galing sa isang pulitiko na nananakot sa kaniyang kalaban.

“Kailangan ma-determine natin ang mga res­ponsable dito yung mga brains ‘di basta yung inu­tusan lang,” anang Defense Chief.

Sa susunod na mga araw ay magtutungo siya sa Basilan upang pulungin ang mga religious groups, mga lider pulitiko at iba pang mga sektor sa la­lawigan upang kunin ang opinyon ng mga ito kung dapat o hindi na isailalim sa Martial Law ang lala­wigan.

Samantala, inihayag kahapon ni AFP-Western Min­danao Command (West­mincom) Comman­der Lt. Gen. Ben Moham­mad Dolorfino na naitaboy na ang Abu Sayyaf raiders sa Isabela City kaya kon­trolado na ang peace and order sa lugar.

Pinabulaanan din ng opisyal ang impormasyon na nagsilikas na ang mga sibilyan sa lugar sa ma­tinding takot.

Sa kabila nito, sinabi ni AFP Chief of Staff Gen. Delfin Bangit na magpa­patuloy ang pagiging vigilante ng tropa ng militar upang masupil ang mga karahasang posibleng ihasik ng mga bandido.