NY Times nanindigan sa Luisita report
MANILA, Philippines - Nanindigan ang pahayagang New York Times na naka-tape ang inilathala nilang pahayag ng isang pinsan ni Sen. Benigno “Noynoy” Aquino na walang balak ang pamilya na bitiwan ang Hacienda Luisita na taliwas sa naunang pahayag ng presidential candidate ng Liberal Party.
Idiniin ni United Luisita Workers’ Union president Lito Bais na hindi maglalathala ang New York Times, na isa sa pinaka-malaki at respetadong dyaryo sa Amerika, ng hindi totoo sapagkat alam ng naturang pahayagan na maaari silang ihabla.
Pinaalala ni Bais na inihayag ni Aquino na handa silang ipamahagi ang Hacienda Luisita sa mga magsasaka alinsunod sa Comprehensive Agrarian Reform Law ngunit ito ay sa 2014 pa o makaraan ang apat na taon.
Hinamon ni Bais si Aquino na humarap sila ng kaniyang pinsan kasama ng New York Times sa publiko at sabay-sabay na dinggin ang tape recording ng pahayag ng pinsan niya kung hindi nagsisinungaling ang presidential bet. (Butch Quejada)
- Latest
- Trending
