Arrest warrant vs Kit Belmonte di totoo

MANILA, Philippines - Pinabulaanan kahapon ng isang kan­di­datong kongresista sa ikalawang distrito ng Quezon City na si Atty. Jose Christopher "Kit" Belmonte ang sina­sabi sa isang paid advertise­ ment sa ilang tabloid na wanted siya sa kasong murder.

Idiniin ni Belmonte sa isang maikling pulong-balitaan na walang naka­bimbing arrest warrant laban sa kanya saan mang bahagi ng bansa.

Sinasabi sa adver­tise­ment na siya at ang tatlo pang tao ay pinaghahanap umano ng batas dahil sa kasong “complex crime of double murder with no bail” at nagpalabas ng arrest warrant laban sa kanila ang isang korte ng Batangas City.

Pinuna ni Belmonte na kasinungalingan at libe­lous ang naturang anun­syo na naglalayon lang na hiyain at gipitin siya. “Inilathala ito nang walang pagsa­saa­lang-alang sa katoto­hanan, due process at panuntunan ng batas,” sabi pa ng abo­gadong kandidato.

Sinabi pa ni Belmonte na ipinawalambisa na ng Court of Appeals noon pang Nobyembre ng naka­raang taon ang arrest warrant laban sa kan­ya sa kaso sa Batangas bukod sa pinatutungkulan lang sa kautusan ng korte ang ibang aku­sado sa kasong murder kaya hindi ito kanya.

Pinuna niya na hindi binanggit sa advertisement ang pangalan ng ibang akusado.

Ipinaliwanag pa niya na, matapos ipawa­lambisa ng CA ang warrant laban sa kanya, is­inampa ng ibang mga akusado ang isang motion na humihiling na suspendihin ang pag­dinig, ibasura ang infor­mation at arrest warrant laban sa kanila at mag­pautos ng panibagong imbesti­gas­yon.

Pero ipinagpaliban ng korte ng Batangas ang pagresolba sa motion ng ibang akusado hangga’t wala pang pinal na de­sisyon ang Korte Sup­rema. Dahil dito, nananatili ang warrant laban sa ibang akusado.

Sinabi ni Belmonte na kanila pang inaalam ang mga responsable sa pag­pa­palabas ng anunsyo pero isa sa maaaring hak­bang niya ang pagsa­sampa ng kasong libelo.