Erap muling nakatapak ng Malacañang

MANILA, Philippines - Muling nakatapak ng Malacañang si dating pangulong Joseph Es­trada matapos ang siyam na taon mula ng patalsikin noong 2001 sa pama­magitan ng EDSA 2.

Sina Estrada at dating pangulong Fidel Ramos ay inimbitahan ni pangu­long Gloria Arroyo na dumalo sa National Security Council (NSC) meeting sa Pa­lasyo, ngu­nit hindi duma­ting si Ramos.

Nagalak si Estrada ng siya ay imbitahan ni Arroyo sa naturang pagtiti­pon at sinabing umaasa siya na makakatulong sa pagha­hanap ng solusyon sa suliranin ng bansa lalo na sa peace and order.

Umaasa din si Es­trada na magiging mata­gumpay ang unang automated election, kasabay ng pag­sasabing nais niyang bu­malik sa Mala­cañang kung ito ay kan­yang “destiny”.

Magkatabi sina Pa­ngu­long Arroyo at Erap sa naturang meeting at nag­karoon pa nga ng “light moment” ang dalawang lider habang ginaganap ang pagpupulong.

Tumatakbo muli si Erap na pangulo sa dara­ting na May 2010 elections sa ilalim ng Pwersa ng Masang Pilipino.

Samantala, sinabi naman ni Press Secretary Cerge Remonde na nag­kaisa ang lahat sa natu­rang meeting na magka­roon ng maayos na re­sulta ng 2010 elections kaya inatasan din ni Pa­ngulong Arroyo sina Interior and Local Government Secretary Ronaldo Puno at Defense Secretary Norberto Gonzales na hadlangan ang New People’s Army sa panghi­hingi ng permit to campaign fee sa mga kandi­dato na umaabot ng P500,000.