300 pulis bantay sa Ampatuan trial

MANILA, Philippines - Aabot sa 300 ang bilang ng mga pulis na ikakalat sa paligid ng Camp Crame sa Quezon City para mag­bantay habang nililitis dito ang mga miyembro ng ang­ kang Ampatuan at ibang sang­kot sa pamamas­lang sa 57 katao sa Ma­guin­danao noong Nob­yem­bre 23.

Isasagawa ang pag­lilitis sa gusali ng Police Non-Commissioned Officers sa Camp Crame na pina­plantsahan na ng seguri­dad.

Ayon kay Philippine National Police Spokesman Chief Supt. Leo­nardo Espina, kasa­lu­kuyan na ring inaayos ang ‘makeshift courtroom sa nasabing gusali.

Nangunguna sa mga isasalang sa paglilitis si Datu Unsay Mayor Andal Ampatuan Jr. na itinuro ng mga testigo na siyang nanguna sa pagbaril sa mga miyembro ng pa­milya ni Buluan Vice Mayor Esmael “Toto “ Mangu­dadatu.

Si Toto ay kalaban sa gubernatorial race ng isa sa mga Ampatuan na siyang pangunahing mo­tibo sa pagpatay sa mga biktima na kinabibilangan ng ma­higit 30 mamama­hayag.

Tiniyak naman kaha­pon ni Acting Justice Secretary Agnes Deva­nadera na maisasampa sa korte ang kasong multiple murder laban sa mga akusado bago pa sumapit ang Peb­rero 10, 2010.

Sa naturang araw matatapos ang 60-araw na deadline ng Department of Justice para matapos ang preliminary investigation sa kaso.

Itutuloy ang preliminary investigation kahit hindi lahat ng respondents sa kaso ay mag­sumite ng counter-affidavits. Tata­pusin nila ang imbesti­gasyon at iba­base na la­mang ang probable cause sa ha­wak nilang ebidensiya kabi­lang ang mga testi­monya ng mga testigo.

Kabilang din sa aku­sado sa kasong multiple murder charges at re­belyon sina Maguin­danao Governor Andal Ampatuan, Sr., Autonomous Region in Muslim Mindanao Governor Zal­dy Ampatuan, Anwar Am­patuan at Akmad Ampa­tuan at iba pa. (Joy Cantos at Ludy Bermudo)