MANILA, Philippines - Tahasang nagpahayag ng suporta si Partido ng Manggagawa Chairman Renato Magtubo kay presidential bet at dating Public Works and Highways Sec. Hermogenes Ebdane para sa darating na 2010 presidential election.
Ayon kay Magtubo, ma ganda at tiyak na mapapaunlad ni Ebdane ang mga manggagawang Pinoy dahil sa plataporma de gobyernong isusulong nito sa oras na manalo sa 2010 presidential election, gaya ng pagpapataas ng suweldo ng mga manggagawa at solusyunan ang iba pang problema ng mga ito lalo na ang mga overseas Filipino workers.
Iminungkahi din ni Magtubo na mas makabubuting maging magkakampi sina Ebdane at Senador Francis “Chiz” Escudero na una ng umatras sa presidential race kahapon.
Si Ebdane na tumatakbo sa ilalim ng Partido ng Mangagagawa at Magsasaka (PMM) ay maghahain ng certificate of candidacy sa Disyembre 1 at inaasahang ihahayag ang kanyang bise-presidente at senatorial slate sa Nobyembre 29 sa UP Bahay ng Alumni.
Dapat din aniyang magsagawa ng pakikipagpulong si Ebdane sa mga manggagawa para mas malaman nito ang nais at nasasaloob ng mga ito. (Butch Quejada)