Abogado inireklamo sa IBP

MANILA, Philippines - Inireklamo kamakailan si Atty. Bonifacio A. Alen­tajan sa Integrated Bar of the Philippines dahil sa umano’y pagpalsipika ng pampublikong doku­mento para sa kanyang kliyen­teng si Siu Ting Alpha Kwok na nahulihan ng P200 milyong halaga ng mga diyamante at ibang mamahaling bato sa Quezon City.

Tumanggi ang IBP na magsalita hinggil sa rek­lamo laban kay Alentajan sa pagsasabing confidential ang impormasyong ito.

Nabatid na ang rek­lamo ay inihain ni Presidential Anti-Smuggling Group Director for Administration and Finance and Chief of Staff Jeffrey Pata­waran.

Hindi makumpirma kay Patawaran ang ulat pero sinasabi ng ilang impor­mante sa PASG na nag­karoon ng gusot sa ilang tauhan ng Malacañang at si Alentajan dahil sa ilang pahayag nito na sumisira sa reputasyon ng ahensya.

Nauna rito, kinasuhan nina PASG Undersec­retary Antonio Villar at ng ibang opisyal nito si Alen­tajan ng libel dahil sa pa­hayag nito na iligal ang pagkakaaresto kay Kwok at humihingi ng mil­ yun-milyong piso ang mga emisaryo ng PASG kapalit ng kalayaan ng kliyente nito.

Inihabla rin ni Pata­waran sina Alentajan, Kwok at isang Agcaoili ng falsification of public document dahil sa umano’y pagplantsa ng mga ito ng petition for bail ni Kwok sa Bureau of Im­migration. (Butch Quejada)