MANILA, Philippines - Maging ang Bureau of Immigration (BI) ay nakiisa na rin sa iba pang empleyado ng gobyerno sa pamimigay ng mga relief goods para sa mga naging biktima ng bagyong Ondoy na nanalasa noong nakaraang linggo.
Sa kautusan ni BI Commissioner Nonoy Libanan, inilunsad nito ang Oplan Sagip sa Kapwa Pilipino na naglalayon na magbigay ng tulong sa gobyerno sa pamimigay ng ayuda sa mga naging biktima ng bagyo.
Itinalaga ni Libanan bilang chairman ng committee si BI executive Director Franklin Littau na magsagawa ng relief program at magplano kung paano makakalikom ng pondo at donasyon na ipamimigay sa mga residente na naapektuhan ng baha.
Itinatag ni Libanan ang Task Force isang araw bago atasan ni Pangulong Arroyo ang lahat ng ahensiya ng gobyerno at tumulong sa relief at cleanup operations sa mga area na lubhang naapektuhan ng baha. (Gemma Garcia)