MANILA, Philippines - Umapela kahapon ang Manila Electric Company sa mga residente na grabeng naapektuhan ng agos-baha sa Metro Manila at iba pang mga lugar na bigyan sila ng sapat na panahon dahil matatagalan pa bago maibalik ang normal na suplay ng kuryente sa mga ito.
Ayon kay Joe Zaldariaga, External Communications Manager ng Meralco, hindi pa maaring ibalik ang suplay ng kuryente sa mga lugar kung saan mataas pa rin ang tubig baha.
Bukod dito ay kailangang ayusin muna ang mga nasirang kable at circuits na dadaluyan ng supply ng kuryente.
Una rito, sa kasagsagan ng pananalasa ng bagyong Ondoy ay napilitang maglambitin sa mga punong kahoy at maging sa mga kable ng kuryente ang ilang mga residente sa mga lugar na sinalanta ng baha na bukod dito’y dumanas pa ng brownout.
Sinabi ng opisyal na marami pa ring mga lugar tulad sa lungsod ng Maynila, Marikina at Pasig at maging ang lalawigan ng Rizal at ilang bahagi ng Bulacan partikular sa bayan ng Plaridel ang nasira ang mga circuits ng kuryente.
Pilit namang ipinababalik sa normal ng mga pribadong kumpanya ang suplay ng kuryente at komunikasyon sa Metro Manila at karatig na lalawigan makaraang masira rin ng pagbaha dulot ng bagyong Ondoy ang kanilang mga pasilidad at mga teknolohiya. (Joy Cantos at Danilo Garcia)