Bayani tuloy sa pagkandidato
MANILA, Philippines - Hindi pa rin natitinag si Metropolitan Manila Development Authority Chairman Bayani Fernando sa pagtuloy ng kandidatura nito sa pagkapangulo sa 2010 kahit hindi eendorso ng Lakas-Kampi-CMD.
Ayon kay Fernando, siya ay “dead serious” sa kandidatura para maging pangulo at naniniwala na siya pa rin ang pipilin ng naturang partido dahil sa isyu ng “Loyalidad” dahil siya ay orihinal na kaanib nito mula pa noong 1992 hindi tulad ni Defense Secretary Gilbert “Gibo”Teodoro.
“I am dead serious about running for presidency. I will run even without party endorsement,” ani Fernando.
Tila nagbanta din si Bayani ng sabihin nitong mag-iisip siya ng kanyang aksiyon sakaling hindi siya ang maging “bet” ng Lakas-CMD at posibleng kakandidato sa ibang partido o bilang independent.
Minaliit din nito ang resulta ng huling survey na naitala ang mataas na ratings ni Senador Benigno “Noynoy” Aquino III.
“Ang aking track record sa pamamahala ang siyang magpapanalo sa Lakas-Kampi-CMD coalition sa May 2010,” aniya.
Sinabi din nito na hindi dapat umasa si Aquino sa mga nagawa ng mga magulang nito at hinamon na dapat na lumaban ng diretso sa pamamagitan ng sariling gawa. (Danilo Garcia)
- Latest
- Trending
