MANILA, Philippines - Nagsigawan sina Senator Richard Gordon at ZTE-NBN whistle blower Jose “Joey” de Venecia III sa ginanap na pagdinig sa Senado ng sabihin ng una na sasampahan ng kaso ang huli kasama ang amang si dating Speaker Jose de Venecia, Jr. at si Rodolfo “Jun” Lozada Jr.
Ayon kay Joey de Venecia, hindi makatarungan at pantay para sa kanila ang nais ni Gordon na sila ay sampahan ng kaso dahil tila sinisipa sila ng gobyerno dahil sa pagiging whistle blo wer sa naudlot na kontrata ng NBN-ZTE deal. Kinuwestiyon din ni Joey DV ang Senado sa pagiging inutil nito na mapaharap si First Gentleman MIke Arroyo sa pagdinig sa Senado at laging tinatanggap ang katwirang may sakit ngunit nagagawang makalabas ng bansa.
“Right now kami ni Jun Lozada ang sinisipa ng gobyerno, kami pa ang gustong kasuhan... Two years na rin akong walang nakikitang Mike Arroyo dito,” sabi ni Joey.
Hindi rin nagustuhan ni de Venecia ang pasaring ni Gordon na siya ay hindi mabuting anak dahil mas pinili pang mapahamak ang ama ng idamay ito ni dating Comelec Chairman Benjamin Abalos sa naturang kontrata.
Kasabay nito, kinuwestiyon ni Lozada ang umano’y hindi patas na desisyon ng Office of the Ombudsman na sina Abalos at SSS President Romulo Neri lang ang nakasuhan dahil marami na aniya siyang isinakripisyo para mailabas ang katotohanan. Nawalan na rin aniya siya ng tiwala sa Ombudsman, lalo pa at wala itong rekomendasyon na kasuhan ang mga matataas na opisyal na sangkot dito. (Malou Escudero)