Pag-abswelto ng Ethics kay Villar hinarang nina Lacson at Roxas

MANILA, Philippines - Napagkaisahan muli si Senador Manny Villar ma­tapos na magkaroon ng iisang desisyon sina Sena­dor Mar Roxas at Panfilo Lacson na huwag munang aprubahan ang rekomen­dasyon ng Senate Committee on Ethics para iba­sura ang alegasyon ng land grabbing ng una.

Una ng napagkasun­duan at napirmahan ng anim na miyembro ng na­turang komite na ibasura ang nasabing reklamo laban kay Villar dahil na rin sa kawalan nito ng huris­diksiyon.

Sa pagdinig ng komite ni Lacson kamakalawa ay agad na naisulong ang re­komendasyon na iabsu­welto si Senador Richard Gordon mula sa reklamo ng isang kongresista ngu­nit agad naman ipinagpa­liban ang pag-absuwelto kay Villar dahil kinakaila­ngan pa na hintayin ang mga dokumentong ipipri­sinta ni Senador Jamby Madrigal hinggil sa usapin sa C-5 Road projects ni Villar dahil posibleng may kaugnayan ito.

Ito ay inaprubahan na­man ni Lacson at patata­galin pa ng ilang linggo ang pagdinig hanggang hindi nasusuri ng general council. Ang nasabing pagpapa­liban ay hiniling ni Roxas.

Gayunman, hindi ikina­gulat ni Villar ang desisyon ng komite dahil alam na aniya ang pagkakampihan ng mga senador na posi­bleng makalaban niya sa presidential election sa 2010.

Matatandaan na hindi tinanggap ni Senate President Juan Ponce Enrile ang mga ebidensiya mula kay Madrigal dahil nang­yari ang alegasyon noon pang 1998 at noong July 2008 ay nagpalabas ng desisyon ang Office of the Ombudsman na nagba­sura sa katulad na kaso ng land grabbing at plunder laban kay Villar at sa asawa nitong si Las Pinas Rep. Cynthia Villar. Sina Roxas at Madrigal ay kabilang sa mga tatakbong presidente sa 2010. (Butch Quejada)