MANILA, Philippines - Mas marami pang miyembro ng Gabinete ang inaasahan ng Malacañang na magbibitiw at susunod kay National Economic Development Authority Chief Ralph Recto.
Sinabi ni Presidential Political Adviser Gabriel Claudio na maraming Cabinet secretary na naghahangad ng elective position at tatakbo sa 2010 election tulad nina Education Sec. Jesli Lapus, Energy Sec. Angelo Reyes, Presidential Peace Adviser Avelino Razon Jr., Agriculture Sec. Arthur Yap, Defense Sec. Gilbert Teodoro, Tourism Sec. Ace Durano, DILG Sec. Ronaldo Puno, Health Sec. Francisco Duque III, MMDA chairman Bayani Fernando at Secretary to the Cabinet Silvestre Bello.
Magugunita na nagbitiw si Recto dahil umano sa “delicadeza” at paghahanda sa kanyang pagtakbo bilang senador sa 2010 election kung saan noong nakaraang buwan pa nito isinumite kay Pangulong Gloria Arroyo ang kanyang resignation letter. Nilinaw din ni Recto na walang kinalaman sa kanyang pagbibitiw ang naging “word war” nila ni Sec. Reyes.
Kasabay nito, umapela si Executive Secretary Eduardo Ermita na di dapat bigyan ng malisya ang pagbibitiw ni Recto at kailangan lang itong igalang.
Samantala, hinamon ni Senador Francis “Chiz” Escudero ang iba pang Cabinet members na tumulad kay Recto para matiyak na hindi magagamit ang pera ng gobyerno sa kanilang kandidatura.
Sinuportahan din ni Escudero si Senador Miriam Defensor Santiago na atasan ang mga Cabinet members na magpaliwanag hinggil sa infomercial ng mga ito sa telebisyon tulad nina Vice President Noli de Castro na Chairman din ng Pag-Ibig fund, Sec. Teodoro, Sec. Puno, Sec. Duque, DPWH Sec. Hermogenes Ebdane, Sec. Lapus, PAGCOR Chairman Efraim Genuino, TESDA chief Augusto Syjuco, at Chairman Fernando.
Naniniwala naman si Senate President Juan Ponce Enrile na hindi na kinakailangang mag-resign sa posisyon ang mga miyembro ng Gabinete hangga’t hindi sila naghahain ng kanilang certificate of candidacy.