Pahayag ni Cruz malisyoso - Cogeo

MANILA, Philippines - Sinabi kahapon ni Confederation of Government Employees Organizations Chairman Jesus Santos na malisyoso at hindi parehas ang akusasyon ni dating Defense Secretary Avelino Cruz na si Pangulong Gloria Arroyo umano ang nagpakana ng mga hakbang na susugan ang Konstitusyon o Charter change.

Nilinaw ni Santos na hindi nagpakita si Cruz ng pisikal na katibayan nang ihayag nito ang naturang akusasyon sa isang pulong ng Integrated Bar of the Philippines.

“Tangi niyang pinanghahawakan ang resolusyong pinagtibay ng House of Representatives na nananawagan sa pagbuo ng Constituent Assembly. Bakit hindi muna niya tanungin ang mga kongresista kung ang Pangulo ang nagpakana nito? Dahil ba sa alam niyang babalik ito sa mukha niya? Bakit ang Pangulo aang direkta niyang sini­sisi? Para sa media mileage?” sabi pa ni Santos. (Butch Quejada)