MANILA, Philippines – Tahasang sinabi ni Lin gayen-Dagupan Archbishop Oscar Cruz na hindi niya iboboto si Pampanga Governor Ed Panlilio sakaling kumandidato itong pangulo ng bansa sa 2010 elections.
Sinabi ni Cruz na mahihirapan siyang ibigay ang boto kay Panlilio lalo pa at alam niyang kulang sa kakayahan ang huli upang pamunuan ang bansa.
“Frankly, hindi ko siya iboboto, sana magbago ang aking kaisipan pero mahihirapan akong ibigay sa kanya ang aking balota”, ayon pa kay Cruz.
Nilinaw ni Cruz na bilang isang tagapaglingkod ng Simbahan, bihasa si Panlilio sa pangangaral ng salita ng Diyos, pakikinig sa taumbayan at pagsasagagawa ng mga sakramento at ang gawain ng isang pari ay malayong-malayo kung ang pag-uusapan na ay ang pamamahala sa buong PIlipinas.
Samantala, hindi nababahala si Defense Secretary Gilbert Teodoro sa pagsali ni Panlilio sa 2010 presidential race.
Ayon kay Teodoro, mas maraming kandidato ay mas masaya at ang maagang pagdedeklara ni Panlilio ay makakabuti sa mamamayan dahil masusuri nito ang kakayahan ng isang tatakbong presidente sa 2010. (Gemma Garcia at Rudy Andal)