MANILA, Philippines – Nagsuguran kaha pon ang mga kamag-anak, kaibigan at iba pang tagasuporta ni dating Pangulong Corazon Aquino sa isang kapilya sa Greenbelt sa Makati para ipagdasal siya nang mapabalitang nasa malubha na siyang kalagayan.
Sinimulan din nila kahapon ang siyam na araw na nobena kasunod ng kumalat ang balitang lumubha na ang kalagayan ni Aquino sa sakit nitong colon cancer.
Isang pahina rin ang inilaan ng Benigno Aquino Jr. Foundation para maipaskel ng sinuman ang kanilang dasal at mensahe sa dati at unang babaeng pangulo ng bansa.
Mahigit isang linggo nang naka-confine sa Makati Medical Center ang dating pangulo mula nang mawalan siya ng gana sa pagkain kasunod ng pinagdaanan niyang radiation treatment.
Nagpahayag din ng pasasalamat si Sen. Benigno “Noynoy” Aquino III sa mga nanalangin para sa kanyang ina.
Hiniling din ng pamilya Aquino sa sambayanang Pilipino na dagdagan pa ang pagdarasal para sa dating Pangulo.
Nabatid na mismong si Cory umano ang humiling na ipagdasal siya.
Noong Marso 2008 natuklasan ng mga duktor na merong colon cancer si Gng. Aquino. (Rose Tesoro/Malou Escudero)