MANILA, Philippines – Sinabi kahapon ni Defense Secretary Gilbert Teodoro Jr. na tsismis at alingasngas lang ang napaulat na Oplan August Moon na naglalayong patalsikin sa puwesto si Armed Forces of the Philippines Chief of Staff Gen. Victor Ibrado.
Layunin din umano sa plano na palawigin ang panunungkulan ni Pangulong Gloria Arroyo sa puwesto.
Napaulat pa na ipapalit kay Ibrado na miyembro ng Class ‘76 ng Philippine Military Academy ang isang miyembro ng PMA Class ’78 na si Army Chief Lt. Gen. Delfin Bangit.
Pero sinabi ni Teodoro sa panayam sa pagdalo niya sa pulong ng Management Association of the Philippines sa Makati na walang basihan ang ulat kasabay ng pagpapahiwatig na hindi ito napapag-usapan sa militar.
Sinabi nina Teodoro at Ibrado na maaaring ipinakakalat lang ito ng mga destabilizer bukod sa haharangin nila ang anumang balak na ganito.
Sinabi naman ng tagapagsalita ng Philippine Army na si Lt. Col. Ar nulfo Marcelo Burgos Jr. na nililito lang ng mga destabilizer ang taumbayan para ipakitang may hidwaan o nahahati ang AFP.
Sinabi naman ni Deputy Presidential Spokesperson Lorelei Fajardo na walang katotohanan ang Oplan August Moon at gawa-gawa lang ito ng mga kritiko ng Pangulo para guluhin ang gobyerno.
Sinabi rin ni AFP-Civil Relations Service Chief Brig Gen. Gaudencio Pangilinan na nais lamang ng mga nasa likod ng nasabing propaganda na palitawin na nagkakahatihati na ang AFP na malayo umano sa katotohanan.
Aniya, nananatiling kumpiyansa ang mga opisyal at miyembro ng 125,000 malakas na puwersa ng AFP sa liderato ni Ibrado. (Joy Cantos, Rudy Andal at Malou Escudero)