Pagpapalawig sa termino ni PGMA planado
MANILA, Philippines – Planado na umano ang hakbangin ni Pangulong Arroyo para mapalawig pa ang termino nito sa 2010 na isasakatuparan katuwang ang mga mambabatas.
Ito ang nakasaad sa kumakalat na text messages mula umano sa isang Philippine Military Academy (PMA) Class 1976 matapos maipasa sa Kamara ang Con-Ass.
Bahagi rin ng kumaka lat na mensahe ang tungkol umano sa pagbaba sa puwesto ng maaga ni PNP Chief Jesus Verzosa at paghalili rito ni National Capital Region Police Office (NCRPO) Director P/Chief Supt. Roberto Rosales ng PMA Class 1978.
Ayon naman kay PNP Spokesman Chief Supt. Leonardo Espina, tiniyak nito na isang ‘apolitical’ na institusyon ang PNP at hindi ang mga ito makikisawsaw sa usapin ng pulitika.
Malabo umanong humantong sa panibagong People Power o rebolusyon ng taumbayan laban sa gobyerno ang hakbanging amyendahan ang Saligang Batas.
Sa panig naman ng AFP, ayon kay AFP-Civil Relations Service Chief Brig Gen. Gaudencio Pangilinan, wala silang namomonitor na mga sundalong lalahok sa anumang kilos protesta tulad ng mga haka-haka.
Ayon kay Pangilinan, propesyunal ang mga sundalo at tumatalima ang mga ito sa itinatadhana ng Saligang Batas kung saan sinumang nagnanais makilahok sa pulitika ay kailangang lisanin muna ang serbisyo.
Minaliit rin ni Pangilinan ang planong paglulunsad ng malawakang kilos protesta ng anti-government groups at sinabing hindi ito pag-uugatan ng panibagong People Power tulad noong EDSA 1 dahil naiiba na ang sitwasyon ngayon kumpara ng mga nagdaang panahon na naitala sa kasaysayan.
Magugunita na noong Pebrero 1986 ay napatalsik sa kapangyarihan ang diktaturyang rehimen ng yumaong si dating Pangulong Ferdinand Marcos sa makasaysayang People Power Revolution. (Joy Cantos)
- Latest
- Trending
