MANILA, Philippines – Bawal munang magsagawa ng shooting ng pelikula, telenovela o patalastas sa Ninoy Aquino International Airport (NAIA) bilang pag-iingat sa nakakahawa at nakamamatay na “AH1Ni virus.”
Pansamantala ring sinuspinde ni Manila International Airport Authority General Manager Al Cusi ang pagi-isyu ng “access pass” na karaniwang ibinibigay sa mga taong maaaring makapasok sa lobby o customs area para sumalubong o maghatid ng kanilang kaanak o kaibigan ng pasahero.
Pinagbabawalan na rin ang mga airport personnel at ibang kawani na pumunta sa lugar na dinadaanan ng mga pasahero maliban na lamang ang mga empleyado na ang trabaho ay asikasuhin ang mga pasahero.
Limang thermal scanners ang balak bilhin nga yon ng MIAA na nagkakahalaga ng tig-P1.4M dahil bukod sa arrival ay maglalagay din sa departure areas sa NAIA 1, Centennial Terminal 2 at NAIA 3.
Ang mga ginagamit ngayong thermal scanners ay nabili pa noong 2003 nang magkaroon ng Severe Acute Respiratory Syndrome (SARS) outbreak.
Nagsimula na ring magsuot ng kanilang face masks at hand gloves ang mga airport personnel bukod pa sa flu vaccine na makukuha nila kasama na ang mga bakuna sa anak, asawa at mga kasama sa bahay.
Maging ang BI office sa Maynila ay nagsusuot na ng face mask bilang pag-iingat na hindi kakalat ang virus sa kanila dahil sa mga passport ng mga dayuhan na posibleng kontaminado ng virus. (Butch Quejada/Ellen Fernando)