Tag-ulan mapapaaga

MANILA, Philippines – Malamang na ma­agang pumasok ang tag-ulan kapag naging ganap na bagyo ang isang wea­ther disturbance na na­mataan sa silangan ng Mindanao.

Ito ang ipinahiwatig kahapon ni Nathaniel Cruz, chief weather forecaster ng Philippine Atmospheric Geophysical and Astronomical Service Administration, na nag­sabi pa na patuloy nilang si­ nusubaybayan ang pag­kilos ng naturang low pressure area na nama­taan sa layong 690 kilo­metro mula sa silangan ng katimugang Minda­nao. 

Ang tag ulan ay kara­niwang unang nararam­daman sa bansa tuwing Hunyo at Hulyo.

Sinabi ni Cruz na ang LPA ay naapektuhan ng intertropical convergence zone na siyang nagda­dala ng kalat kalat na pag ulan sa Mindanao.

Ang Metro Manila at iba pang panig ng Luzon ay dumaranas ng ma­naka-nakang pag uulan na epekto naman ng tail-end ng cold front.

Gayunman, sinabi ng PAGASA na baka maka­ligtas din sa LPA na ito ang bansa dahil lumawak ang tail-end ng cold front na umiiral sa dulong hilagang Luzon.

Hinaharang ng cold front ang namumuong sama ng panahon o LPA kaya hindi ito makapasok sa bansa. (Angie dela Cruz)