Beso-beso at holding hands bawal dahil sa swine flu

MANILA, Philippines – Pinayuhan kahapon ng Department of Health ang publiko na iwasan muna ang makipagbeso-beso at makipaghawak-kamay sa ibang tao dahil sa pangamba laban sa swine flu virus na na­unang na­paulat na kumalat at nag­dulot ng sakit at kama­ta­yan sa maraming tao sa Mexico at United States.

Napaulat hanggang kahapon na 100 katao na sa Mexico ang namama­tay sa naturang virus.

Sinabi ng hepe ng Na­tional Epidiomology ng DOH na si Dr. Eric Tayag, bagaman wala pa silang natatanggap na ulat na umabot na sa Pilipinas ang swine flu virus, makakabu­ting iwa­san ito dahil naku­kuha ito sa hangin.

Sa katunayan anya, mas mabilis pang kuma­kalat ang swine flu virus kumpara sa Severe Acute Respiratory Syndrome na sumalanta sa China may ilang taon na ang naka­raan.

Subalit aminado si Tayag na wala pang ga­mot para sa nasabing sakit kaya pinapayuhan nito ang mamama­yan na dapat palaging maghu­gas ng kamay at takpan ang ilong at bibig kung uubo.

Samantala, nilinaw ng Bureau of Animal Industry na hanggang sa nga­yon ay hindi pa rin nala­laman ang pinanggali­ngan ng human cases ng swine influenza at wala pang makapagpatunay na galing ang naturang virus sa mga babuyan.

Sinabi na rin ni Dave Catbagan ng BAI, na bagaman may ipinatupad nang ‘ban’ sa mga baboy mula sa Mexico at U.S., walang inaangkat na buhay na baboy sa Mexi­co ang Pilipinas.

Nakabantay na ang mga quarantine officers sa lahat na mga seaport at airport at nakikipag-ugnayan na rin sila sa Bureau of Customs.

Tiniyak din ng opisyal na walang dapat pa­ngam­ba­han sa swine flu ang bansa dahil regular ang pag­bakuna sa ilang babuyan.

Sinabi din ni Department of Agriculture Secretary Arthur Yap na ipi­nagbawal nila pansaman­tala ang pagpasok sa Pilipinas ng mga produk­tong karneng baboy mula sa Mexico at U.S. dahil sa ulat na dinapuan ng swine flu virus ang mga baboy doon.  

Hinikayat ni Yap ang mga magbababoy sa ban­sa na pabakunahan ang kanilang mga alagang baboy.