PAO todo suporta kay Acosta
MANILA, Philippines – Ipinarating ng mga opisyal, abogado at staff ng Public Attorney’s Office (PAO) kay Pangulong Arroyo ang kanilang pagpapahayag at pagdedeklara ng suporta kay Chief Public Attorney Persida Rueda-Acosta.
Kalakip ng kanilang liham ang tatlong pahinang ‘manifestation and declaration of support’ kay Chief Acosta, na nilagdaan ng lahat Regional Director at opisyal nito.
Ayon sa mga opisyal ng naturang ahensiya, simula pa ng matalaga noong 2001 si Chief Acosta, ay patuloy umano ang pagganap nito sa kanyang tungkulin bilang Pinuno ng PAO.
Pinasalamatan din nila ang Pangulong Arroyo sa pag-apruba ng Republic Act No. 9406 o PAO Law na kanyang nilagdaan noong March 23, 2007, kung saan ang naturang batas ay hindi lamang nagsisilbing lakas ng ahensya kundi maging takbuhan ng mga mahihirap at walang kapangyarihan.
Batay sa manifesto, nakasaad umano sa section 4 ng RA no. 9406, article II ng memorandum circular no. 18, na maaring pagkalooban ng PAO ng tinatawag na “instant and provisional assistance” ang mga suspek na isinasailalim sa “custodial interrogation/investigation.
Nakasaad din umano sa Section 2 ng naturang batas (An Act Reorganizing and Strengthening the Public Attorney’s Office) ang pagiging ‘independent and autonomous ng naturang tanggapan subalit attached sa Department of Justice pagdating sa policy at program coordination nito.
Giit ng mga ito, tinupad lamang ng kanilang Hepe ang pagganap sa mandato ng PAO, ng pagkalooban ng ‘instant and provisional assistance’ ang brodkaster na si Ted Failon at mga kasambahay nito makaraang makatanggap ng tawag sa telepono ang una mula sa DZMM. (Gemma Garcia/Ludy Bermudo)
- Latest
- Trending
