Hong Kong columnist pinapa-blacklist

MANILA, Philippines - Umalma ang samba­yanang Pilipino laban sa isang Hong Kong columnist makaraang tawagin nito sa kanyang artikulo sa HK magazine ang Pilipinas na bansa ng mga alipin o “nation of servants”.

Sa naturang artikulo ni Chip Tsao na may titulong “At War at Home,” naka­saad na walang karapatan ang Pilipinas na angkinin ang Spratlys at kunin ito mula sa China dahil isa ang huli sa mga bansang nagpapa­sahod sa mga Pinoy na nagtatrabaho bilang domestic helpers.

Inutusan pa ni Tsao ang kanyang kasambahay na Pinay na sabihin sa lahat ng DH doon na ang Spratly ay pag-aari ng China at kung magkaka­giyera ay ma­ pipilitan umano si Tsao na pauwiin at sibakin ang kanyang katulong.

Bunsod nito, nana­wagan si Parañaque Rep. Roilo Golez na iboykot ang pagbiyahe sa HK at pag­tangkilik sa kanilang mga produkto pati na mga pag­kain sa loob ng 6 na buwan.

Sa Senado, pinakaka­suhan naman ni Sen. Chiz Escudero si Tsao dahil na­ka­taya dito ang paninin­digan ng bansa, samantala public apology naman ang hingi ni Sen. Pia Cayetano.

Pinakilos na ng Mala­cañang si DFA Sec. Alberto Romulo para utusan ang Philippine Consulate sa HK para magsagawa ng pag-aaral kung ano ang epekto ng pang-aalipusta ni Tsao sa mga Pinoy. Hini­ling din ni Labor Under­secretary Susan Ople na i-blacklist si Tsao sa Pilipi­nas at idek­larang “undesirable alien” at persona non grata.

Habang isinusulat ang balitang ito, humingi na ng paumanhin ang publisher ng HK ma­gazine. (Butch Quejada/Malou Escudero/Ellen Fernando / Mer Layson/Rudy Andal)