Bihag pupugutan ng Abu!

MANILA, Philippines - Muling binalaan ng Abu Sayyaf Group ang militar na pupugutan nito ang isa sa mga miyembro ng International Committee of the Red Cross sa loob ng ling­gong ito kung hindi aalisin ng gobyerno ang tropa ng militar sa lugar na kanilang pinagkukutaan.

Ang pinakabagong pa­nanakot ay ginawa ni ASG Commander Albader Pa­rad noong Lunes sa paki­kipag-usap nito sa isang opisyal ng gobyerno.

Gayunman, hindi pu­mayag ang panig ng militar sa nais ng ASG dahil ma­ituturing na traydor umano ang mga ito at hindi ma­runong tumupad sa kani­lang sinasabi.Titiyakin din ng militar na hindi mawa­wala sa kanilang paningin ang ASG.

“Hanggang ngayon sumusugal tayong lahat na matatapos din ang paki­kipag-bargain ng ASG at tuluyan nang pakakawalan ang mga bihag nila,” ayon naman kay AFP Spokesman Lt.col. Ernesto Torres.

Ayon naman kay Lt. Col. Edgard Arevalo, taga­pagsalita sa “hostage crisis” sa Sulu, magsisilbing daan ang kanilang pag-atras ng puwersa sa po­sibleng pagtakas ng mga bandido. Iginiit nito na dahil sa naturang pagbabanta, lumalabas ngayon na epektibo ang kanilang ibinibigay na “pressure” sa mga bandido.

Hindi rin ikinokonsidera ni AFP Chief Gen.l Alexan­der Yano ang “pullout” ng kanilang puwersa at ma­nanatili ang mga ito sa ka­nilang posisyon sa Sulu. 

Sinabi ni Yano na ma­hirap pagkatiwalaan ang pahayag ng mga bandido dahil una na silang hindi tumupad sa pangakong pakakawalan ang isa sa mga bihag matapos silang mag-reposition ng kani­lang puwersa sa bayan ng Indanan kamakailan.

Ngunit ayon kay Philippine National Red Cross chairman Sen. Richard Gordon, mas lalo pang lumaki ang “demand” ng ASG kung saan hinihingi ng mga ito ang “two-thirds” ng Jolo at pag-atras ng mga armadong barangay volunteers na unang hindi ka­sama sa kasunduan.

Una ng nagbanta si Parad na papatayin ang lahat ng bihag nito kung muling magtatangka ang gobyerno na pasukin ang kanilang kuta at kunin ang mga hostages.

Ang ICRC members na sina Swiss national An­dreas Notter , Mary Jean Lacaba at Italianong si Eugenio Vagni ay binihag ng ASG noong Enero 15 sa Jolo, Sulu.