Tipid kuryente solusyon sa energy crisis

MANILA, Philippines - Pinayuhan ni Balanga, Bataan Bishop Socrates Villegas ang publiko na magtipid sa kuryente upang maiwasan ang pi­nangangambahang pag­kakaroon ng energy crisis kung saan dapat itong pangunahan ng mga go­vernment offices at ng mga industrial sector.

Ginawa ni Villegas ang pahayag bilang reaksyon sa panukala sa Kamara na buhayin muli ang Bataan Nuclear Power Plant (BNPP) na nasa Morong, Bataan.

Labis ang pagtutol ni Villegas sa pagbuhay sa BNPP dahil delikado umano ito sa kalusugan at sa kalikasan.

Binigyang-diin pa ni Villegas na dapat ding ikon­sidera ng mga mam­babatas ang paggamit ng solar at wind energy bilang alternatibo sa halip na nuclear power plant, dahil higit itong mas malinis, ligtas at mas mura, at ma­rami na ring bansa ang gumagamit nito sa kasa­lukuyan.

Ayon pa kay Villegas na napakaraming geothermal sources sa bansa na maaring gamitin, kung hahanap lamang ng pa­raan ang gobyerno. (Doris Franche)