Airport manager sinibak!

MANILA, Philippines - Sinibak sa puwesto ang area manager ng Legaspi Airport matapos umanong gawing “training ground” ng kanyang anak na lalaki ang runway para sa kanyang nobya na nag-aaral mag­maneho ng sasakyan sanhi upang muntik nang bu­mangga ang isang papa-landing na eroplano ng Cebu Pacific nitong Sa­bado. 

Iniutos ni Civil Aviation Authority of the Philippines (CAAP) director general Ruben Ciron na alisin si Frisco Sto. Domingo bilang area manager ng Legaspi Airport na ngayon ay naka-official leave.

Pinag-aaralan naman ng CAAP ang pagsa­sam­pa ng kaso laban sa anak nitong si Frisco Sto. Do­mingo Jr. 

Base sa report, nitong Sabado, napilitang i-abort ng piloto ang pa-landing na sanang Cebu Pacific flight CEB-172 sa Legaspi Airport na nagmula pa sa Mactan International Airport sa Cebu dakong alas-2:10 ng hapon nang bu­mara at humarang umano sa runway ang Delica lite ace van ng nakababatang Sto. Domingo.

Kasalukuyang tinutu­ruan umano ni Sto. Do­mingo Jr. ang kanyang nobya sa pagda-drive sa runway gamit ang natu­rang van at hindi napansin ang pababa nang ero­plano.

Bago ang landing ng nasabing eroplano, pina­gana ng control tower ng Legaspi airport ang si­rena nito bilang hudyat at babala para sa mga si­bilyan o mga sasakyan sa tarmac na may pa-landing na eropla­no at kaila­ngang ma-clear ng lugar.

Idinahilan ni Sto. Do­mingo Jr na hindi niya na­rinig ang tunog ng sirena at sa paparating na ero­plano. (Ellen Fernando)