Estafa vs Greencross owners binasura ng Parañaque RTC

MANILA, Philippines - Tinapos na ng Parañaque Regional Trial Court (RTC) ang lahat ng usapin hinggil sa pagmamay-ari ng Greencross Incorporated matapos nitong ibasura ang lima sa kasong estafa na isinampa ng dating pangulo nitong si Gonzalo Co It laban sa kanyang mga kapatid. Ang tagumpay na ito ay pinaka-bago sa mga nauna nang pagbasurang ginawa ng Pasay RTC at ng Manila Metropolitan Trial Court (MMTC) noong nakaraang taon.

Sa 16 pahinang desisyon ni Judge Fortunito L. Madrona ng branch 274 noong 30 Enero nitong taon, inayu­nan nito ang isinampang Motion to Dismiss ni Green­cross counsel Atty. Estelito Mendoza para ipawalang saysay ang limang  magkakahalintulad na estafa cases na sinampa ni Gonzalo Co It sa korte laban sa kanyang kapatid na si Anthony Co.

Sa kanyang mosyon, sinabi ni Mendoza na hindi napatunayan ng prosekusyon at ni Co It na tukuyin ang mga kapatid niya na aniya’y gumawa sa kanya ng nasa­bing krimen. Sa mga pagkakataong nagpresenta ito ng ebidensya sa korte, hindi umano napatunayan ni Co It na may misapropriasyon sa mga shares ng kumpanya.

Nagpahayag naman ng kagalakan si Green Cross president Anthony Co, kasama ng kanyang mga kapatid, anak at mga pamangkin. Sinabi ni Anthony Co na nakahi­nga na sila ng maluwag sa pagbasura ng korte sa mga kaso.