Inisnab kahapon ni Sen. Lito Lapid ang hearing ng sarili niyang panukalang batas na dininig ng Senate committee on rules kaugnay sa paggamit ng wikang Filipino sa mga opisyal na usapan sa Senado.
Hindi dumating si Lapid sa nasabing hearing upang ipagtanggol ang kanyang panukala na naglalayong isantabi ang wikang English sa mga opisyal na dokumento at isalin sa Filipino maging ang rules ng Senado.
Kahit wala si Lapid, agad naman kinatigan ng rules committee ang panukala at inaprobahan ni Sen. Juan Miguel Zubiri.
Kilala si Lapid na palaging umiiwas sa media na bagaman at palagi itong pagpapa-check ng attendance bago magsimula ang sesyon ay agad ding nawawala at hindi sumasali sa talakayan sa plenaryo.
Kilala rin si Lapid na mahinang umintindi ng wikang Ingles at kung minsan ay nagbibitbit ng interpreter sa sesyon ng Senado.
Nag-aalala naman si Sen. Mar Roxas na magmistulang ‘balagtasan’ ang talakayan sa Senado kung masyadong malalalim na Tagalog ang gagawin. (Malou Escudero)